سيدي الرئيس / فودافونعندي مشاكل كتيرة جدا مع النظام ده .. أولا النظام بيقطع فينا ..
أقصد الشبكة بتقطع ومش بسمع كويس واضح اننا اتعودنا ع التقطيع .. ومعدناش قادرين نتكلم ..
لكن بجد انا مش قادر أسكت .. وبجد كفاية كدة
أولا عمري ما كنت بتكلم أبدا عن الشبكة أو النظام ..
لكن بجد اكتشفت أني مظلوم .. ولازم أطالب بحقي
ولو فضلت كده هعيش وأموت مظلوم ..
ودا غير تركيبتي اللي أبدا مبتقبلش الظلم ..
دا غير إني مش هضيف أي حاجة ..
هبقى اكتفيت اني أعيش وأموت وأنا "فودافون" ..
ليه هو مفيش غير الشبكة دي ؟؟ ومفيش غير النظام ده ؟؟
الحكاية كلها أني لما بدأت أقرأ شوية عن الشبكات والأنظمة والخدمات
اللي بيقدمها لنا السيد "فودافون" لقيت أن الناس مش لاقيه تاكل
ولقيت إن فعلا المهم عند الأخ فودافون " من غير سيد "
انه يفضل الشبكة الوحيدة في مصر بغض النظر عن أي حاجة وأي حد تاني
فقلت جايز علشان هو صح وهو اللي فاهم .. في الانظمة ..
بعد كده لقيتني لما بشحن ب 100 مبخدش غير 70
والمشكلة أني كمان بدفع ضرايب يعني نتعب ونشقى ونحاول بكل جهد
وفي الأخر حد غيرنا ياخد حقنا اليومين دول بقى ..
وصلني اليقين انه _فودافون _ أهم حاجة عنده انه يفضل فودافون
حتى بعد ما يموت هيحنطوه ويفضل فودافون هو رقم واحد في مصر
وبرضو ميتغيرش .. ليه ؟؟ هو مفيش شبكات تانية في مصر ؟
مفيش حد تاني بيفهم خالص ؟ أنا صحيح عندي 27 سنة
بس النظام ده حتى من قبل ما أتولد وهو مسيطر .. ليه ؟
هو إحنا خلاص فودافون ده قديس ؟ قد يكون أدى دوره من وجهة نظر البعض
لكن يبقى أن دوره انتهى "اعذرني يا فودافون .. التاريخ مبيرحمش حد"
ومش عارف ليه بتفكرني دايما بالإعلان اللي بيقول
"شبكة واحدة .. بتسرقنا كلنا " نصيحتي .. فوق بقى ..
وانسى البدل والجرفاتات اللي حواليك
اللي فاضلك أقل بكتير من اللي فات من عمرك الموضوع كبير قوي ..
ولو جينا نفكر هتبدأ ازاي تصلح البلاوي اللي عملتها هناخد وقت كبير قوي
في التفكير بس أنت عارف أيه اللي احنا طالبينه ؟
أن صوتنا يوصل .. "من غير تقطيع" وصدقني أنا نويت خلاص ..
لو مصر كلها هتفضل فودافون _الشركة اللي عمرها اكتر من 83 سنة _
مع احترامي الشديد ليها أنا هحول لشبكة تانية .. شبكة تحترم عملائها
شبكة تقدر تسمعنا .. تحسسنا بالأمان " مش بوجود الأمن"
تدينا حقنا مش تسرقنا كلنا وتضيع حقنا .. حقنا اللي عمرنا ما طالبنا بيه
لكن صدقني يا فودافون .. حقنا عمره ما هيضيع لأننا مش مع التطبيع
مش التطبيع بتاع اسرائيل .. لكن لو وافقنا على أعوانك يبقى كأننا قبلنا التطبيع
انا كدة خلصت لكن هقولك كلمة بأمانة
أنا مش عايزك يا فودافون
مش كره فيك ..
مش كره فيك ..
لكن حب للأفضل
وحتى لو قبلت اني افضل 010
برضو هتفضل جوايا الفكرة
ولو عشنا لبكرة
هفكرك انا وانت ..
كل اللي بينا
مش هيكون حاضر
بس للأسف هيفضل ذكرى
شكرا جزيلا
محمود ابراهيم
.
