أنور البلكيمي .. خطأ كبير

لو كتبت أنور البلكيمي على جوجل هتلاقي

كمية أخبار غير طبيعية ما بين استهزاء واستنكار

وغضب وحزن .. النائب البلكيمي اعترف انه

مش مصدق انه قدر يكذب هذه الكذبة

وقدم استقالته من حزب النور وكمان من مجلس الشعب

مش هدافع عنه لكن أحب أقول لكل الناس أن دي (غلطة)

صحيح هي غلطة كبيرة جدا في حق نفسه وفي حق الشعب

لكن كلنا بنغلط .. وكلنا بنعمل بلاوي .. الفرق 3 حاجات

انه عضو مجلس شعب

وأنه سلفي (بدقن يعني)

وأن كذبه فضح على الملأ
يريت كل الناس اللي واخده الموضوع دا بتريقة .. تقفله ..

مسألة الكذب دي كبيرة صحيح لكن كل يوم بتحصلنا

من العسكر والحكومة والسياسيين وغيرهم

الراجل أخطأ وتم عقابه .. وأشهد الله أني سامحته

خلص الكلام

مبادرة فيس بوكيَة .. ولا أنا مشبهش ؟؟

بمناسبة مبادرة الشيخ محمد حسان "ادفع لبلدك"

علشان أخوكم داخل على جواز .. وانتوا عارفين الحالة الاقتصادية اليومين دول

فأنا قررت أعمل مبادرة أنا كمان .. بس على الديق .. يعني .. عندي 550 صديق تقريبا

هنقول كل واحد هيدفع 100 جنيه بس ولمرة واحدة في العمر .. يا بلاش :))

بكدة هيبقى معانا 550 * 100 .. يبقى وصلنا لـ 55 ألف جنيه .. يا سلام .. مكنتش اعرف

ان الفيس بوك حلو بالشكل ده .. أو الشعب المصري بالقلب

الحنين ده .. واعتبرني ابوك يا أخي :))

وبعدين هما أحسن مني في أيه ؟

دول أهانوك وضربوك وسحلوك وأصابوك وسجنوك وقتلوك .. ودحكوا عيك وقالوا انهم "حموك".. لاء ومكفهمش .. فخونوك وكفروك وقالوا عليك بتاع كنتاكي وبتضرب ترامادول وبتقبض ومتآمر وعايز تقسم مصر .. وياعيني مكفهمش .. فقالولنا أنتوا ساكتين على بعضكوا ازاي ؟؟ انزلوا حاربوا بعض وخلصونا وخلصوا مصر .. وياعيني بردو مكفهمش فقالوا خلاص طالما لسه عايشين يبقى يدفعولنا .. مش هم جدعان قوي وعملوا ثورة .. طب ادفع بقى يا حلو منك له ..

المشكلة أن الكبار اللي بيقولوا أنهم بيحبوا مصر لو استغنوا بس عن مرتب شهر .. شهر واحد هنوفر ميزانية بلد بحالها !!

يبقى بذمتكوا كدة تدفعولي انا .. ولا تدفعولهم !!!

.