مع كل بداية بطولة رياضية مصرية مهمة زي الدوري المصري أو كأس إفريقيا
الحكومة المصرية قصدي "النظام" لازم يعمل معانا عمله مش ظريفة
زي مثلا زيادة أسعار للجاز .. سكر وزيت .. دا حتى كيس الملح اللي كنت بشتريه "ببريزة" بقى بجنيه
من ساعتها وانا مش بشتري ملح .. بروح لبتاع الفول وأقوله حطلي "ملاحة"
"يعني شوية ملح صغيرين في قرطاس صغير .. شفتوا الغلب وصل لفين ؟؟
احنا بقى النهاردة داخلين على كارثة
لما يكونوا بيعملوا كدة في بداية الدوري المصري وكأس إفريقيا
أمال هيعملوا فينا أيه في كأس العالم ؟؟
بجد ربنا يستر .. الناس دي جابت آخرها معانا ..
ومش قادرين نستحمل أكتر من كدة
الواحد كل ما تيجي سيرة الحكومة قلبه يوجعه من قلة الاخلاق والافترا ..
وما خفي كان أعظم
ومش بس قلبه يوجعه دا كمان بيقرف
وبيتخنق ومبيطقش يتكلم كلمة
سؤال واحد بس
أمته يا حكومة عملتوا حاجة خلتنا نقول .." والله ناس محترمين "
نفسي وانا عايش اشوف واحد بس يقول الكلمة دي
انا مبتكلمش عن سرقة ونهب
ولا بلطجة وقلة أدب
ولا أمين شرطة برتبة قائد قوات جوية
ولا مسئولين ملهمش علاقة بينا
ولا 300 ج راتب شهري للموظفين
ولا أبرياء بيموتوا ف عبارة منتهية الصلاحية
ولا 25 مليون مواطن مش لاقيين ياكلوا
ولا الاستدعى اللي بيجيلي كل 3 شهور من ساعة ما بدأت أشتغل
هو ليه يا حكومة مبنحبكش ؟
ليه بقول الكلام ده وانا مليش اي علاقة بالسياسة ولا حتى افهم فيها
ليه بتربوا جوانا كره النظام
ولا احنا أصلا مش ف بالكوا ؟
ولا تعرفونا .. وولا كأننا موجودين ؟
هو في حاجة واحدة بس هيا اللي مريحاني
ومخلياني مطمئن جدا ان حقي عمره ما هيضيع
هيا .. ان هييجي يوم .. كله عدل .. مينفعش يتظلم فيه حد
وكلنا هناخد حقنا .. وساعتها .. ربنا يكون في عونك يا حكومة
ويخليلك كاس العالم "علشان تسوقي فيها أكتر وأكتر "
واحنا لينا ربنا اللي مفيش حق بيضيع معاه
دا مش ضعف يا حكومة .. لكن والله ما اديتلنا وقت حتى نقف قدامك
ونقول انكوا ظلمه .. يريت تفوقوا بقى
انا همشي
كفاية كدة .. اصل كاس العالم هيبدأ
وشكلي هنام ف العسل شهر كامل
إلعبي بقى يا حكومة
محمود ابراهيم
.
